Tūranga Wātea

Ko te matua o ngā mahi ka kawea e Te Taura Whiri i te Reo Māori ko te whakarauora ake i te reo Māori. Ko tā mātou kaupapa mātāmua he whakatinana i te mana o te reo Māori hei reo whaimana, he whakatairanga hoki i te reo Māori hei reo mataora o ia rā, o ia rā e makere māori noa mai ana i ngā ngutu o ōna tāngata, ka mutu, he arataki hoki i te whakaritenga o te whakatinanatanga o Te Maihi Karauna.

Ko tā mātou whāinga he whakarite i tētahi taiao e taea ai e te iwi Māori, e te tangata Māori hoki te eke panuku mā Te Maihi Māori, otirā, he rite te Rāngai Kāwanatanga, te rāngai tūmataiti me ngā whakahaere hapori whānui ki te tautoko i te whakarauoratanga ake o te reo Māori. E hiahia ana mātou kia kaingākautia te reo Māori e Aotearoa whānui hei wāhanga o tō tātou tuakiritanga ā-motu, hei reo mataora hoki kia hari ai te ngākau tangata, kia whakanuia ai anō hoki e te katoa – i ngā wā, i ngā wāhi, i ngā huarahi katoa, ka mutu, e ngā tāngata katoa.

Kei te kimi tāngata he kaha tōna kōkiri ā-rautaki, tōna maromahue hoki ki te reo Māori, tēnā, whakapiri mai, whakatata mai kia aratakina ngātahitia ai e tāua te whakaritenga o te whakatinanatanga ake o Te Maihi Karauna (Te Rautaki Reo Māori a te Karauna).

 

Kaitohutohu Matua Mahere Reo - He Tūranga Pūmau

Ko tā te Kaitohutohu Matua Mahere Reo he ārahi, he whakatenatena, he whakaruruhau anō hoki i ngā kaitohutohu mahere reo o Te Hiringa, hei tautoko i te Kaiārahi Tīma me te Kaihautū. Ka whakamahi koe i ō wheako huhua o te whanake rautaki hei hono atu ki ngā hinonga. Ka whai wāhi hoki koe ki te whakarauoratanga o te reo Māori i roto i te rāngai tūmatanui me te rāngai tūmataiti mā te hāpai, mā te ārahi anō i te whakawhanaketanga o ngā mahere reo, tae ana ki:

  • Te ārahi i te āwhinatanga ki ngā hinonga o te Rāngai Tūmatanui ki te whakawhanake i ā rātou mahere reo kia hāngai ki ngā whāinga o te Maihi Karauna.
  • Te whakatairanga i ngā tikanga pai mā te whakapāpātanga puta noa i ngā hinonga.
  • Te āwhina i te whanaketanga o ngā utauta me ngā rauemi mō te mahi whakamahere reo a te Rāngai Tūmatanui.
  • Te tuku i ngā tohutohu me ngā whakahoki kōrero mō te whakamahere reo ki Te Taura Whiri i te Reo Māori, tae ana ki ngā kaha me ngā ngoikoretanga o ngā kōkiringa rerekē o ngā mahi mahere reo a ngā hinonga.

Ka inea te angitū o tō hono atu ki te Rāngai Tūmatanui, i runga anō i te kaha o te whakapiri mai a ngā hinonga ki Te Taura Whiri i te Reo Māori i roto i ngā mahi mahere reo.

He kōrero mōu

Hei Kaitohutohu Matua Mahere Reo ka whakatauira mai koe i ō wheako ki te ārahi tangata. Ka āhei hoki koe ki te whakaaweawe i ngā kaiwhakahaere, i ngā hoa mahi, me te hunga whaipānga, mā roto hoki i tēnei mea te kaupapa Māori. Ko te uho o ō mahi katoa ko te whakawhanaungatanga me te aro pū ki te whai mārama ki ngā hiahia e puta ake ana. Ka whakaatuhia mai hoki tō mārama pū ki ngā kaupapa nui e whai pānga ana ki te whakarauoratanga o te reo Māori.

Ka mauria mai tō wheako ki te whakahaere kaupapa, ki te taunaki panonitanga i a koe e whakaaweawe ana, e tautīnei ana i ngā hononga kia eke panuku. Ka mauria mai anō hoki tō māia me ō pūkenga ki te whakaaweawe, ki te whai hononga anō ki ngā taumata katoa o tētahi whakahaere.

Kei a mātou nei

  • Tētahi whakahaere e tārai ana i te motu mā te whakarauora i te reo Māori kia pai ake ai ngā pāpori
  • He tūranga i roto i tētahi whakahaere ka hua ake ai he panonitanga tūturu
  • He whakahaere e tautoko ana i ngā whakaritenga mahi ngāwari
  • Tētahi whakahaere e ngākaunui ana ki te whakapakari i te kaimahi i roto tonu i te horopaki o te reo Māori me te ao Māori, ā;
  • He tūranga pūmau ki te tīma mahere reo o Te Hiringa

Kia whai wāhi koe ki tēnei tūranga, me āhei koe i raro i te ture ki te mahi ki Aotearoa nei, ā, me whakakī koe i te Puka Tono.

Te Utu: $72,000 - $97,000

Mehemea kei a koe te motika ture ki te mahi ki Aotearoa, ā, e hiahia ana koe ki te tono mō tēnei tūranga, tēnā tukua mai tō reta taunaki me tō tāhuhu tangata ki vacancy@tetaurawhiri.govt.nz

Pāwhiria ki konei kia kite i te Whakaaturanga Mahi

Ka kati ngā tono a te 12am Rātapu 17th o Whiringa-ā-nuku 2021.

 


 

Kaitohutohu Mahere Reo - He Tūranga Pūmau

Ko tā te Kaitohutohu Mahere Reo, he tuku tohutohu ā-mahere reo, hei taunaki anō i te tīma mahere reo o Te Hiringa, i te Kaiārahi Tīma, i te Kaihautū anō hoki. Ka whai wāhi koe ki te whakarauoratanga o te reo Māori i roto i te rāngai tūmatanui me te rāngai tūmataiti mā te hāpai, mā te ārahi anō i te whakawhanaketanga o ngā mahere reo, tae ana ki:

  • Te ārahi i te āwhinatanga ki ngā hinonga o te Rāngai Tūmatanui ki te whakawhanake i ā rātou mahere reo kia hāngai ki ngā whāinga o te Maihi Karauna.
  • Te whakatairanga i ngā tikanga pai mā te whakapāpātanga puta noa i ngā hinonga.
  • Te āwhina i te whanaketanga o ngā utauta me ngā rauemi mō te mahi whakamahere reo a te Rāngai Tūmatanui.
  • Te tuku i ngā tohutohu me ngā whakahoki kōrero mō te whakamahere reo ki Te Taura Whiri i te Reo Māori, tae ana ki ngā kaha me ngā ngoikoretanga o ngā kōkiringa rerekē o ngā mahi mahere reo a ngā hinonga.

Ka inea te angitū o tō hono atu ki te Rāngai Tūmatanui, i runga anō i te kaha o te whakapiri mai a ngā hinonga ki Te Taura Whiri i te Reo Māori i roto i ngā mahi mahere reo.

He kōrero mōu

Hei Kaitohutohu Mahere Reo ko te uho o ō mahi katoa ko te whakawhanaungatanga, ko te aro pū hoki ki te whai mārama ki ngā hiahia e puta ake ana. Ka mauria mai tō wheako ki te whakaaweawe, ki te tautīnei anō i ngā hononga kia eke panuku. Ka mauria mai anō hoki tō māia me ō pūkenga ki te whakaaweawe, ki te whai hononga anō ki ngā taumata katoa o tētahi whakahaere.

Ehara i te mea me matatau rawa koe ki te reo Māori, heoi he huanga nui tēnei i te mea ka mahi koe i tētahi taiao e tautoko mārika ana i te whakarauoratanga o te reo Māori.

Kei a mātou nei

  • Tētahi whakahaere e tārai ana i te motu mā te whakarauora i te reo Māori kia pai ake ai ngā pāpori
  • He tūranga i roto i tētahi whakahaere ka hua ake ai he panonitanga tūturu
  • He whakahaere e tautoko ana i ngā whakaritenga mahi ngāwari
  • Tētahi whakahaere e ngākaunui ana ki te whakapakari i te kaimahi i roto tonu i te horopaki o te reo Māori me te ao Māori, ā;
  • He tūranga pūmau ki te tīma mahere reo o Te Hiringa

Kia whai wāhi koe ki tēnei tūranga, me āhei koe i raro i te ture ki te mahi ki Aotearoa nei, ā, me whakakī koe i te Puka Tono.

Te Utu: $61,000 - $80,000

Mehemea kei a koe te motika ture ki te mahi ki Aotearoa, ā, e hiahia ana koe ki te tono mō tēnei tūranga, tēnā tukua mai tō reta taunaki me tō tāhuhu tangata ki vacancy@tetaurawhiri.govt.nz

Pāwhiria ki konei kia kite i te Whakaaturanga Mahi

Ka kati ngā tono a te 12am Rātapu 17th o Whiringa-ā-nuku 2021.